ကချင် ပြည်နယ် ဗန်းမော်မြို့နယ်ထဲ အခြေချထားတဲ့ အစိုးရ စစ်တပ်က စစ်သား တစ်ဦးဟာ ဒေသခံ အသက် ၇၂ နှစ် အရွယ် အဘွားအိုကို မုဒိန်းပြုကျင့်ဖို့ ကြံစည် ကြိုးစားခဲ့လို့ ဆိုပြီး စစ်ဖက်တရားရုံး ကနေ အဲဒီ စစ်သားကို ထောင်ဒဏ် ၇ နှစ် ချမှတ်လိုက်ပါတယ်။
တကယ် သားမယား ပြုကျင့်ခဲ့ခြင်း မရှိပေမယ့် တပ်မတော်အပေါ် ထားရှိတဲ့ ပြည်သူ လူထုရဲ့ အမြင်ကို ထိခိုက်စေနိုင်တဲ့အမှု ဖြစ်တာကြောင့် အမြင့်ဆုံးပြစ်ဒဏ် ထောင် ၇ နှစ် ချမှတ်ခဲ့တာ ဖြစ်တယ်လို့ ပြန်ကြားရေးဝန်ကြီးဌာနရဲ့ ထုတ်ပြန်ချက်ထဲ တွေ့ ရပါတယ်။
အဲဒီ့ စစ်သားကို အရပ်က ဝိုင်းဖမ်းကြတုန်းက အဝတ်အစားတွေ ကျွတ်နေတာမျိုးလို ထင်ရှားတဲ့ အထောက်အထားတွေ ရှိခဲ့လို့ အဘွားအိုအပေါ် ကျူးလွန်ဖို့ အားထုတ်နေတာကို ဒေသခံတွေ အသိ ဖြစ်တယ်ဆိုပြီး ကချင် နှစ်ခြင်း ခရစ်ယာန်အသင်း ကေဘီစီရဲ့ ပြန်ကြားရေး တာဝန်ခံ ဦးလမိုင်ယော်က ဘီဘီစီကို ပြောပါတယ်။
စစ်တပ်ကနေ အခုလို အရေးယူမှု ပြုလုပ်တာမျိုးကို သူ့ အနေနဲ့ ပထမဆုံး ကြားဖူး လာတာဖြစ်တယ်လို့လည်း ဦးလမိုင်ယော်က ဆိုပါတယ်။
တိုင်းရင်းသား နယ်မြေတွေမှာ အစိုးရ စစ်တပ်က အဓမ္မကျင့်တာ လူသတ်တာတွေ ကျူးလွန်လေ့ ရှိပေမယ့် အရေးယူ အပြစ်ပေးတာမျိုး နည်းပါးလှတယ် ဆိုတဲ့ စွပ်စွဲမှုတွေ အစဉ်အဆက် ရှိခဲ့ပါတယ်။
အခုတော့ ဒီလို အထင်အမြင် လွဲမှားစေတဲ့ ကိစ္စရပ်မျိုးတွေ ကျူးလွန်သူတွေကို ထိထိရောက်ရောက် အရေးယူမယ်လို့ အာဏာပိုင်တွေဘက်က ထုတ်ပြန်ထားပါတယ်။
BBC Burmese
မှတ်ချက်များ