 |
| ဆီးရီးယား သမ္မတ Bashar al-Assad စစ်သားတွေကို နှုတ်ဆက်စဉ် (Credit: AFP) |
ဆီးရီးယား သမ္မတ Bashar al-Assad က အမေရိကန် ဦးဆောင်တဲ့ အနောက်အတိုင်း စစ်တပ်နဲ့ ဆော်ဒီအာရေးဘီးယား ဦးဆောင်တဲ့ မဟာမိတ်တပ်တွေက အီရတ်နဲ့ ပူးပေါင်းပြီး IS အဖွဲ့ကို တစ်နှစ်ကြာ တိုက်ခိုက်လာပေမယ့် အကြမ်းဖက် အဖွဲ့တွေ ဆက်လက် တည်ရှိရုံသာမက အကြမ်းဖက် ဝါဒီတွေ ပိုမို ကျယ်ပြန့်သွားသလို အကြမ်းဖက် ဖြစ်လာတဲ့ လူတွေတောင် ပိုများလာတယ်လို့ ဝေဖန်ခဲ့ပါတယ်။
အခု ဆီးရီးယား အစိုးရက ရုရှားနိုင်ငံ၊ အီရန်နိုင်ငံနဲ့ အီရတ်တို့နဲ့ ပူးပေါင်းပြီး အကြမ်းဖက်ကို တိုက်ခိုက်နေတာက ပိုပြီးတော့တောင် ထိရောက်မှု ရှိတယ်လို့လည်း ပြောလိုက်ပါတယ်။
ဒီတိုက်ပွဲကိုလည်း နိုင်အောင် တိုက်ရမယ့်အကြောင်း နိုင်အောင် မတိုက်နိုင်ရင် ဆီးရီးယားနဲ့ အီရတ်နိုင်ငံသာမက အရှေ့အလယ်ပိုင်း ဒေသ တစ်ခုလုံး ပျက်စီးသွားနိုင်တဲ့အတွက် ဖြစ်တယ်လို့လည်း အီရန်နိုင်ငံက ရုပ်မြင်သံကြားတစ်ခုနဲ့ တွေ့ဆုံမေးမြန်းခန်းမှာ ဆီးရီးယား သမ္မတက ပြောသွားခဲ့တာပါ။
ဆီးရီးယားနိုင်ငံအတွင်းက IS အကြမ်းဖက် သမားတွေကို နှိမ်နင်းဖို့ ရုရှားက အင်အားတွေ ထပ်မံ ဖြည့်ဆည်းသွားမယ်လို့ ပြောဆိုပြီး တစ်ရက်အကြာမှာပဲ ဆီးရီးယား သမ္မတက အခုလို ပြောဆိုခဲ့တာပါ။
အနောက်တိုင်းနိုင်ငံတွေက အကြမ်းဖက်မှုကို အားပေးတဲ့အတွက် အကြမ်းဖက်သမားတွေကို ဖြိုခွင်းနိုင်မှာ မဟုတ်ဘူးလို့လည်း ဝေဖန်လိုက်ပါတယ်။
အနောက်တိုင်းနိုင်ငံတွေက ဆီးရီးယား သူပုန်တွေကို ထောက်ပံ့နေတာကို ဆီးရီးယား သမ္မတက မကျေမနပ် ဖြစ်နေပြီး အစိုးရကို ဆန့်ကျင်တဲ့ သူပုန်တပ်ဖွဲ့မှန်သမျှကို အကြမ်းဖက်အဖွဲ့အဖြစ် သတ်မှတ်ထားတာ ဖြစ်ပါတယ်။
ဆီးရီးယား အစိုးရက ရုရှားနဲ့ ပေါင်းပြီး IS တွေရှိရာကို ပစ်မှတ်ထား တိုက်ခိုက်မှုတွေ လုပ်ခဲ့တယ်လို့ ကြေညာခဲ့ပေမယ့် အနောက်တိုင်းနိုင်ငံတွေကတော့ IS ကို ပစ်မှတ်ထားတာ မဟုတ်ပဲ အစိုးရကို ဆန့်ကျင်တဲ့ သူပုန်တပ်ဖွဲ့ကို ပစ်မှတ်ထား တိုက်ခိုက်ခဲ့တာလို့ ဝေဖန်ထားပါတယ်။
ရုရှားရဲ့ လုပ်ရပ်ဟာ သားသတ်သမား Bashar al-Assad ကို ထောက်ခံနေရာ ရောက်ပြီး ရုရှားအနေနဲ့ မှားတဲ့ ဘက်က ရပ်တည်နေတာလို့ ဗြိတိန် ဝန်ကြီးချုပ် ဒေးဗစ်ကင်မရွန်က ပြောပါတယ်။
ဂျာမနီနိုင်ငံ ဝန်ကြီးချုပ်ကလည်း ရုရှားက ဆီးရီးယား အစိုးရနဲ့ ပူးပေါင်းနေတာကို ဝေဖန်လိုက်ပါတယ်။
ABC Radio Australia
မှတ်ချက်များ