ခုဆိုရင် မြန်မာနိုင်ငံသားအားလုံး၊ မြန်မာ့ နိုင်ငံရေးကို စိတ်ဝင်စားသူ အားလုံး စောင့်ကြည့်နေကြတဲ့ လွှတ်တော်ထဲက ၂၀၀၈ ဖွဲ့စည်းပုံအခြေခံ ဥပဒေ ပြင်ဆင်ရေး အဖြေ တစ်ခု ထွက်လာပါပြီ။ ဖွဲ့စည်းပုံထဲက ပြင်ဆင်ဖို့ အခက်ဆုံး ပုဒ်မ တွေထဲက အပိုဒ် (၆) ခုကို ပြင်ဆင်ဖို့ တင်ထားတာမှာ တစ်ခုကလွဲရင် ကျန်တာအားလုံး အဆို ရှုံးနိမ့်ခဲ့ပါတယ်။ ဘယ်သူက အနိုင်ရပြီး ဘယ်သူက ရှုံးနိမ့်တာပါလဲ၊ လက်ရှိ လွှတ်တော်ထဲ ဖြစ်ပွားခဲ့တဲ့ ဖွဲ့စည်းပုံပြင်ရေး လှုပ်ရှားမှုရဲ့ တကယ့် အဓိပ္ပါယ်က ဘာပါလဲ၊ ဒီ အဖြစ်အပျက်ကနေ ဘာတွေ သင်ခန်းစာ ယူသင့်သလဲ ဆိုတာ ခုတစ်ပါတ် ဆွေးနွေး တင်ပြသွားပါ့မယ်။
ပြောရရင် ၂၀၀၈ ဖွဲ့စည်းပုံ အခြေခံဥပဒေဟာ ဒီမိုကရေစီ နည်းမကျဘူး၊ အများကြီး ပြင်ဆင်ဖို့ လိုတယ်ဆိုပြီး ပြောလည်းပြော၊ ၂၀၁၂ ကြားဖြတ်ရွေးကောက်ပွဲမှာ ပါတီ လုပ်ငန်းစဉ် တစ်ရပ်အဖြစ် ကြွေးလည်း ကြွေးကြော်ခဲ့သူကတော့ ဒေါ်အောင်ဆန်းစုကြည်နဲ့ NLD အမျိုးသားဒီမိုကရေစီ အဖွဲ့ချုပ်ပဲ ဖြစ်ပါတယ်။ ဒါပေမယ့် နောက်ပိုင်း ပြည်ခိုင်ဖြိုးပါတီ ခေါင်းဆောင်တွေက ဖွဲ့စည်းပုံ ပြင်ရေးကို သူတို့လည်း လက်ခံတယ်လို့ ပြောဆိုလာပြီး လွှတ်တော်တွင်း ဖွဲ့စည်းပုံ ပြင်ဆင်ရေးကို လက်ဦးမှု ရယူ၊ ၂၀၁၃ နှစ်လည် မှာ စ အကောင်အထည်ဖော် ဆောင်ရွက်ပါတော့တယ်။ အဆိုတင်တာ၊ ဖွဲ့စည်းပုံ ပြင်ဆင်ရေး လေ့လာသုံးသပ်ရေး ပူးပေါင်း ကော်မတီဖွဲ့တာ၊ ဖွဲ့စည်းပုံ ပြင်ဆင်နိုင်ရေး အကောင်အထည် ဖော်မှု ကော်မတီ ဖွဲ့စည်းရာမှာလည်း ဦးဆောင်မှု နေရာ ရယူပါတယ်။ အဲဒီ ကော်မတီတွေ ဖွဲ့စည်းရာမှာ NLD နဲ့ အခြားပါတီက အမတ်တွေ၊ တိုင်းရင်းသား အမတ်တွေ ပါဝင်ပြီး အကြိမ်ပေါင်း ၄၀ ကျော် ဆွေးနွေး ငြင်းခုံခဲ့ကြတယ်လို့ ဆိုပါတယ်။
ဒေါ်အောင်ဆန်းစုကြည်နဲ့ NLD ပါတီကတော့ ဖွဲ့စည်းပုံ ပြင်ရေးအတွက် အဲဒီထက် အများကြီး ပိုပြီး အားစိုက်ခဲ့တာ တွေ့ရပါတယ်။ ၈၈ ပွင့်လင်း အဖွဲ့အစည်းနဲ့ ပေါင်းပြီး စည်းရုံးဟောပြောပွဲတွေ လုပ်တာအပြင် ပြည်သူ၅ သန်းကျော်ရဲ့ ထောက်ခံ လက်မှတ်တွေရအောင် စည်းရုံး ကောက်ခံနိုင်ခဲ့ပါတယ်။ ဒါပေမယ့် တကယ့်တကယ် ဖွဲ့စည်းပုံပြင်ဆင်ရေး ဥပဒေကြမ်း လွှတ်တော်ထဲ တင်တဲ့အခါ ပြည်သူတွေ လိုလားတဲ့၊ အင်န်အယ်လ်ဒီက ပြင်ဆင်ချင်တဲ့ ပုဒ်မတွေ မပါသလို၊ ပြင်ဆင်ဖို့ တင်ပြထားတာတွေကလည်း မူလ အခြေခံဥပဒေနဲ့ သိပ်ပြီး မခြားနားတာ တွေ့ကြရပါတယ်။ တိတိကျကျ ပြောရရင် ဖွဲ့စည်းပုံ ပြင်ရေးနဲ့ ပတ်သက်ပြီး အင်န်အယ်လ်ဒီဟာ ပြိုင်ပွဲကိုတောင် ၀င်ခွင့်မရတဲ့ အားကစားသမား တစ်ယောက်လို ဖြစ်သွားတာပါ။
VOA Burmese
မှတ်ချက်များ