အရှေ့တောင်အာရှ ဒေသတွင်း ကြုံတွေ့နေရတဲ့ လှေစီးဒုက္ခသည် ပြဿနာကို ကိုင်တွယ်ရေးနဲ့ ပတ်သက်ပြီး မြန်မာ အပါအဝင် အာဆီယံ နိုင်ငံတွေရဲ့ ဝန်ကြီး အဆင့် အရေးပေါ် အစည်းအဝေးကို ဇူလိုင်လ ၂ ရက်နေ့က မလေးရှားနိုင်ငံ ကွာလာလမ်ပူ မြို့တော်မှာ ကျင်းပခဲ့ရာမှာ လူကုန်ကူးမှု တိုက်ဖျက်ရေး အပါအဝင် ဒုက္ခသည်တွေ ကယ်ဆယ် စောင့်ရှောက်ရေး ကိစ္စတွေမှာ ဒေသတွင်းနိုင်ငံတွေ အနေနဲ့ ရံပုံငွေ အသီးသီး ထည့်ဝင်သွားဖို့ ဆုံးဖြတ်ခဲ့ပါတယ်။
ဒီအစည်းအဝေးမှာ မြန်မာနိုင်ငံက ရိုဟင်ဂျာတွေကိစ္စ၊ ထိုင်းနဲ့ မလေးရှား အပါအဝင် တခြားဒေသတွင်း နိုင်ငံတွေကို လူမှောင်ခို တင်သွင်းနေတဲ့ ကိစ္စတွေအပေါ် အာရုံစိုက် ဆွေးနွေးခဲ့ကြတယ်လို့ သိရပါတယ်။
ဒါပေမယ့်လည်း ဆွေးနွေးခဲ့တဲ့အထဲမှာ ရိုဟင်ဂျာတွေ မြန်မာပြည်ကနေ ထွက်ပြေးနေရတဲ့ အခြေခံ အကြောင်းရင်းကို ဖြေရှင်းနိုင်မယ့် အချက်တွေ မပါခဲ့ဘူးလို့ အာဆီယံ ပါလီမန် အမတ်တွေရဲ့ လူ့အခွင့်အရေးအဖွဲ့ ဥက္ကဌ၊ မလေးရှား ပါလီမန်အမတ် Charles Santiago က ဘီဘီစီကို ပြောပါတယ်။
ရိုဟင်ဂျာအရေးမှာ မြန်မာနိုင်ငံက အရင်းခံ ဖြစ်ကြောင်း၊ ဒါပေမယ့် အာဆီယံရဲ့ တနိုင်ငံနဲ့ တနိုင်ငံ ပြည်တွင်းရေး မစွက်ဖက်ရေးမူအရ မြန်မာနိုင်ငံအပေါ် ရိုဟင်ဂျာ အရေး နဲ့ပတ်သက်ပြီး ဖိအားမပေးလို ဖြစ်နေတာ တွေ့ရကြောင်း သူက ပြောသွားပါတယ်။
မြန်မာအစိုးရ အနေနဲ့ ပြုပြင်ပြောင်းလဲမှုတွေ လုပ်ဆောင်နေတယ်၊ ဒီမိုကရေစီ လမ်းကြောင်းကို သွားနေတယ်ဆိုရင် ရိုဟင်ဂျာတွေအရေးနဲ့ ပတ်သက်ပြီး ဥပဒေကြောင်းနဲ့အညီ နိုင်ငံသား ဖြစ်ခွင့်လို ကိစ္စမျိုးတွေ အပါအဝင် လူ့အခွင့်အရေး ဆိုင်ရာကိစ္စတွေမှာ တိုးတက်ကောင်းမွန်အောင် လုပ်ရမှာ ဖြစ်တယ်လို့လည်း ဆိုပါတယ်။
တခါ ဘင်္ဂလားဒေ့ရှ် လှေစီးဒုက္ခသည်တွေ ကိစ္စကို ကြည့်မယ် ဆိုရင်လည်း စီးပွားရေးအရ လှေပေါ်ကို ကိုယ့်သဘောနဲ့ကိုယ် တက်လာကြသူတွေ ရှိသလို လူမှောင်ခို ပွဲစားတွေရဲ့ သားကောင်တွေအဖြစ် လှည့်စားခံရသူတွေလည်း ရှိနေတာမို့ ဘင်္ဂလားဒေ့ရှ် အစိုးရအနေနဲ့ အသေအချာ စုံစမ်းကိုင်တွယ်ဖို့ အရေးကြီးတယ်လို့ အာဆီယံ ပါလီမန်အမတ်တွေရဲ့ လူ့ အခွင့်အရေးဆိုင်ရာအဖွဲ့ ဥက္ကဌ ၊ မလေးရှား ပါလီမန်အမတ် Charles Santiago က ပြောပါတယ်။
တနိုင်ငံချင်းစီရဲ့ ပြည်တွင်း ပြဿနာတွေကို ပွင့်ပွင့်လင်းလင်းနဲ့ အဖြေရှာဖို့ မလုပ်ဘူးဆိုရင် အခု ဖြေရှင်းဖို့ ကြိုးစားနေတဲ့ နယ်စပ်ဖြတ်ကျော် ဖြစ်ပေါ်နေတဲ့ ရာဇဝတ်မှုတွေ၊ ကျွန်ပြုခိုင်းစေခံရမှု ပြဿနာတွေကို ဖြေရှင်းဖို့ ဘယ်လိုမှ ဖြစ်နိုင်မှာ မဟုတ်ဘူးလို့လည်း သူက ပြောပါတယ်။
BBC Burmese
မှတ်ချက်များ